A o taoto ai i le Faamasinoga Maualuga se tapenaga a le vaega faaupufai e puipuia aiātatau a tagata mo le faamasinoga na te faauiga ma aumai se faai’uga i le tulaga lē mautonu ua iai nei le faigamalo a le vaega faaupufai o le Faatuatua i le Atua Samoa ua Tasi, o le Aso Tofi o lenei vaiaso na tuuina atu ai se tusi a le ta’ita’i o le Itu Agai le susuga Tuilaepa L Sailele Malielegaoi, ua logo ai le Fofoga Fetalai i le tapenaga a lana itu faaupufai e faatū se lafo o le lē faatuatuaina poo le motion for a vote of no confidence e aveese ai le tofi Palemia o loo umia e le sui faipule tamaitai o le itumalo palota o Lotofaga le afioga Fiame Naomi Mataafa.
O le feiloa’iga masani a le susuga Tuilaepa ma le vasega o tusitala i lenei vaiaso na ia faailoa ai lea tapenaga.
Le ta’ita’i o le Itu Agai ma le vaega faaupufai e puipuia aiātatau a tagata susuga Tuilaepa L Sailele Malielegaoi.
O le Aso Lua o le vaiaso a sau pe a toe tauaofia le fono aoao faitulafono o le a faatino ai le tapenaga a le ta’ita’i o le Itu Agai ma lana vaega faaupufai.
O le vaega faaupufai o loo agaia le malo e 18 nofoa o loo latou umia, o le pati faaupufai o le Faatuatua i le Atua Samoa ua tasi lea ua i le ta’ita’iga a le susuga Laauli Leuatea Polataivao Fosi Schmidt e 29 e aofia ai minisita o le Kapeneta e to’aiva, e lē faitaulia ai le to’aono o minisita e aofia ai le Palemia ua faamuta e le faafaletui o faipule to’atele a lea pati lo latou toe avea ma sui aloa’ia o lea vaega faaupufai.
Ua mae’a ona faailoa e le Fofoga Fetalai susuga Papalii Li’o Oloipola Ta’eu Masipa’u i le Palemene i le aso 21 o Ianuari na toe amata ai fonotaga a le Palemene, e lē talafeagai i lana silasila i lenei taimi se gaioiga e faatū ai se lafo o le lē faatuatuaina.
Peitai o le a tatou tālia le vaiaso fou pe a toe tauaofia le fono usu a Samoa.
