Talosaga Fuiono e aveese suafa o nisi o tagata mai le lola palota a Falealupo

E 338 tagata palota o le itumalo palota o Falealupo ua faailoa iai e tatau ona agai i le Ofisa o le Komisi o faigapalota e aveesea mai o latou suafa mai le lola palota a lea itumalo ao le’i oo i le Aso 26 o Novema.

O lea aso ua atofaina o le a toe fai ai le faiga filifiliga a lea itumalo faapea ai ma isi itumalo palota e 6 ua avanoa nei o latou nofoa i le Palemene.

O lea fautuaga o loo faailoa i le talosaga a le sui tauva le susuga Fuiono Tenina Crichton o lea ua faatōai i le Komesina o Faigapalota i le mau a Fuiono o ia tagata palota e 338 e lē agavaa ona avea ma tagata palota e le gata e le’o nonofo ai i le itumalo ae e le’o ni matai foi o Falealupo.

O le talosaga lenei ua faia e tusa ma aiaiga o le vaega 28 o le Tulafono o faigapalota o le tausaga e 2019. O loo iai le avanoa o lea aofaiga o tagata palota e tuuina atu ai o latou tetee i le talosaga ua i luma nei o le Komesina ma le Ofisa o le Komisi o faigapalota.

O Fuiono Tenina Crichton o le sui tauva mo le vaega faaupufai a le Faatuatua i le Atua Samoa ua Tasi (FAST) mo le palota laititi a Falealupo lea o le a toe tauva ai ma le sui o le vaega faaupufai e Puipuia Aiā Tatau o Tagata (HRPP) ua faailoa e lea pātī faaupufai le afioga Tuitogamanaia Dr. Peniamina Junior Sopoaga Leavai.

O se tasi o alo e faasino i le afioga ia Aeau Peniamina Leavai na umia le nofoa o Falealupo muamua i tausaga e tele.

O Fuiono Tenina o le FAST sa tauva i le faigapalota tele ia Aperila ae na manumalo mai ai le sui tamaitai o le vaega a le HRPP le afioga Leota Tima Leavai lea na faaulu iai ni moliaga e Fuiono o faiga faatosina solitulafono.

Peitai e pei ona silafia na talia e Leota le toe faamavae ma le tofi o le itumalo e le toe tauva i le palota laititi ina ua fausia se maliega ma lē na faauluina le tagi tau palota lea ua toe tauva i le palota laititi a lea itumalo. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required