Ua talosaga se alii o se tagatanuu o Tonga sa galue o se pailate mo le kamupani vaalele o le Talofa Airways, e ala i lana loia e toe ioilo aiaiga o loo tatala ai i tua e faatali le masina o Me o le tausaga fou e su’esu’e ai mau o moliaga a leoleo o loo tuua’ia ai.
O Mikaele Paea o loo mana’o e fia tuua lo tatou atunuu i le fuafuaga e faia ni aiaiga pe a mafai ona alu ese ma Samoa, e faamautū ai lona toe foi mai e tali i moliaga e lua o le faiaiga faamalosi i se teineitiiti e i lalo o le 16 tausaga le matua.
O loo tetee malosi loia mo le itu a leoleo i le talosaga ma o le a tuuina atu lea talosaga tetee i le faamasinoga i le vaiaso a sau, ona faatulaga ai lea o se aso e iloilo ai le talosaga a Mikaele ma lana loia pe talia le toe iloilo o aiaiga o loo tatala ai i tua.
O faamaumauga a leoleo o loo faailoa ai o Setema o le tausaga nei i Vailele na tula’i mai ai le solitulafono o loo molia ai Mikaele Paea He Lotu Mateo 26 tausaga o le soifua.
