Vaccine Pfizer

Tālia vailaau o le Pfizer e taunuu i le atunuu i le faaiuga o le vaiaso

O le faaiuga o le vaiaso nei o le a taunuu ai le uta muamua o le vailaau o le Pfizer mo le faia o tui puipui o fanau mai le 12 i le 17 tausaga le matutua, o le fesoasoani lea a le Mālō o Niu Sila.

Ua tapena ai nei le Matagaluega o le Soifua Maloloina ma le Komiti o Faalavelave Faafuasei i le faatulagaina o galuega ao faasolo ai pea le faia o tui puipui o le faama’i Koviti19 o loo faaaoga ai le vailaau o le AstraZeneca. Ua faailoa e le Faatonu Sili o le Soifua Maloloina Leausa Dr. Take Naseri e silia i le 6,000 tagata i totonu o le atunuu ua maea le 8 vaiaso talu ona uma le tui muamua ma ua tatau ona fai le tui lona lua peitai e lei oo atu lava mo le faia o lea tulaga.

Ua talosagaina ai le aofaiga o tagata e tatau ona agai ane i se falemai faaitumalo ma nofoaga o loo faia ai tui ina ia faatino loa le tui lona lua. 

Taua e le Faauluuluga o le Ofisa faapitoa o faalavelave faafuasei le NEOC Agafili Shem Leo “O le tagi foi a le pumate ina ia alofagia e le atunuu o le 6,000 e le’o se tamai numera, matou te manatu lava ina ne’i le taua i nisi le galuega lenei o le puipuia nai loo le tau togafitia”

Na talosagaina ai foi sui o nuu ma sui tamaitai o nuu ina ua fesoasoani i le galuega a le Komiti e ala lea i le tuu atu o suafa o i latou o loo tālia a latou tui lona lua ina ia faataunuuina loa.

O le pasese e silia i le 200 na taunuu mai mai Niu Sila e tusa nei ma le vaiaso talu ai ua maea a latou suega poo test muamua ma le lua e Leai lava seisi o aafia i ni auga o le faama’i corona vairusi poo le Koviti19. E 21 aso o loo faanofoesea ai ona faatoa tatala lea i o latou aiga pe a faia e tumau lava le leai o se isi e maua i ni auga o le faama’i. 

I malaga i le va o Samoa ma Amerika Samoa e le’o toe faia ni malaga ae ua silasila le Komiti a le Matagaluega o le Soifua Maloloina i ni aiaiga pe afai e toe tatala ia malaga i se taimi ua talafeagai ai.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required