O le Aso Lulu o le vaiaso nei, aso 6 o Iulai o le a talia ai e Ausetalia pasese e taunuu atu mai isi atunuu e le’i faia tui o le Koviti.
O lea suiga ua faia e fua i fautuaga mai le pule sili o le soifua maloloina Paul Kelly, ma o le a taga ai pasese femalaga’i e taunuu atu ma o ese e aunoa ma le tau tāpā o faamaoniga o tui o le Koviti.
I le taimi nei o loo talia na o tagatanuu Ausetalia faapea ai ma nisi o loo umia visa e le’i faia tui ua mae’a ioeina, e faimalaga atu i Ausetalia.
O le faamaoniga mai le pule sili o le vaega a le soifua maloloina e pei ona ia ta’ua e le o toe moomia le faailoa o le faia ma le lē faia o le tuipuipui o le Koviti mo pasese e taunuu atu.
A o talia ai i lalo o faaiuga a le malo, i lalo o lea tulafono fou o loo sau ai foi e moomia pea le usitaia o taiala a kamupani vaalele atoa ai ma le tatau ona faaaogā ufi fofoga i luga o vaalele.
