Ua tali faalauaitele le komesina o leoleo, Andrew Coster ma faapea mai ua ia tapena e tali manaoga o le malo e faatatau lea i le sailia o kegi.

I se tusi a le komesina agai i lana minisita fou Mark Mitchell, o loo talafeagai lelei le tatau ona siisii o le malosi e faafetaiai ai ma taofia kegi nei e pei latou te pulea le aualatele aemaise o le faatupulaia o isi faiga faasolitulafono.

Peitai, o le faatasitasi o kegi i nofoaga faitele ua fai mai ai le komesina, e moomia muamua le sui o le tulafono ina ia aloaia ai.

I le taimi nei o lea o loo galue le komesina ma ia fautuaina le minisita e tusa ma manaoga faapea taiala ua mae’a faataatia mai e galue agai iai.

A o tali ai la e le komesina le tusi ma maliega ua mae’a aumai e le minisita, o loo sau ai ma le talosaga a le komesina e moomia le faaopoopo o nisi leoleo fou e faatinoina le galuega.