Nafanua II
Nafanua II

Tagatagai le malo i le faia o se komisi suesue i le pa’ulia ai o le Nafanua

O le isi mataupu na laualuga i le feiloaiga a le Tamaitai Palemia afioga Fiame Naomi Mataafa ma Tusitala i le vaiaso nei na ia faailoa ai ua silasila le malo e faia se Komisi suesue i le faaletonu ua mafua ai ona pa’ulia le vaa leoleo o le Nafanua II.

O le Matagaluega o Galuega Tetele a le Malo e iai foi le latou sailiiliga faapea le suesuega faalotoifale o le Matagaluega o Leoleo e faasino tonu lea i le mafuaaga na tupu ai le faaletonu.

O le komisi suesue o le isi lea sailiiliga e silasila ai i tulaga aoaotetele o le faaletonu ua mafua ai ona oso le vaa leoleo i le a’au ma paulia ai i le taimi nei.

Ua faailoa foi e le Palemia e 2 vaiaso o le a folau mai ai i le vasa se aumalaga mai Ausetalia, o i latou ua iai le tomai i galuega i luga o le sami mo le faia o se galuega fesoasoani e laveai ai le vaa leoleo o le Nafanua II.

O le 2 vaiaso o loo malaga mai ai o le a faitau i aso e 14 e tatau ona faanofoesea ai pe a taunuu i Samoa i le faamoemoe a tū laueleele i fanua ma faaolatia mai le faigamalaga ona agai sa’o loa lea e faatino le latou galuega.

Ua atoa le tolu vaiaso talu ona pa’ulia le Nafanua II i le a’au i le agai atu i le motu tele i Salafai, talu mai le Aso 5 o Aukuso.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required