O le tulai mai o le faiaoga fou o le Manu Samoa le susuga ia Mase Mahonri Schwalger, ua ia filifilia ai ma lana pulega fou e galulue faatasi i le toe taumafaiga o le ‘au a le atunuu o alo ma tamafanau a Samoa sa tautua muamua i le Manu Samoa.
E pei ona iai le susuga ia Lemalu Tusi Pisi, Alesana Tuilagi, Census Johnston ma isi tamalii o le atunuu sa tautua muamua i le Manu Samoa.
O le lagona o le susuga i le faiaoga ua aumai ai tama tuai o le Manu ina ia maua se pulega latou te iloa le ‘au, ia malamalama i le tulaga o loo iai le ‘au a le Manu Samoa i le taimi nei i le utiuti o le tupe, ia mafai ona suia le ‘au i le taimi nei ma tapenaina le ‘au i le tasi le vaiaso a o loma le taaloga ma Iatalia ma Spain.
O le pulega o le ‘au o loo aifilofilo ai ma le afioga i le faipule ia Faleomavaega Titimaea Tafua o loo fai lea ma faufautua i le susuga i le faiaoga ia Mase.
O se tamalii ua iloga lona sao i le ‘au a le atunuu ua tele foi lona silafia i le faatinoina o le taaloga lakapi.
Sa ia filifilia foi tama taalo o le ‘au, i le tama taalo e fia auai i le Manu Samoa e ofu i le jersey ma tauave le igoa o le atunuu.
O le tele o tama sa fesootai iai le susuga i le faiaoga sa totogi lava le pasese o le tama taalo ma malaga i Samoa auā le tautuaina o le atunuu.
Saunoa le susuga ia Mase Mahonri e tasi le vaiaso na tapena ai le ‘au a le Manu Samoa i taaloga e lua ua mae’a, ona ua vaivai le seleni i le iuni lakapi a le atunuu.
Ua mae’a le Ipu a e Lalolagi sa iai, ae o lea ua toe amata le isi nofoaiga fou, se’i toe tilotilo poo le ā se lagona o fanau taaalo, ma se’i toe faafoi le ‘au i le atunuu.
O le faaletonu o le ‘au i mea tau tupe e toe tali mai lava le atunuu e fesoasoani mai ai pe a tele ni malo e malo ai le Manu Samoa i ana taaloga.
I le taimi nei o loo iai le tupe i le iuni ae lē o lava, ona o le tausaga lenei o loo taufai malaga le tele o ‘au lakapi, e pei ona iai le Manu Samoa 7 i le taamilosaga o le Olimipeka, o le Junior Manu Samoa Uner 20 i le Ipu o le Lalolagi i Sikotilani o loo faatinoina nei tapenaga uma e le iuni lakapi.
O le tapena atu o le Manu Samoa i le taamilosaga o le Pacific Nation Cup i le masina fou, e lē o iai se popolega o le faiaoga i ‘au o loo auai i lea taamilosaga, ae o le popolega o le faoiaga, o le ‘au a le atunuu le Manu Samoa ona e fou le ‘au, ma o le a ia tulimatai tapenaga mo le laina i luma faapea le laina i tua o lana ‘au ina ia maua se manumalo i le taamilosaga o loo loma nei.
