O loo moomia e leoleo ata video mai nisi o tagata e nonofo i Sisifo o Aukilani se’i fesoasoani i suesuega o loo faia nei faasaga i se tamaitai aoga e faapea na taumafai se tasi o tamā e toso i totonu o lana taavale i le Aso Lua.
Ua faamaonia mai e le aoga maualuga a Green Bay High School o lē na aafia o se tasi e aoga i le kolisi, ma o le tea o le fā i le afiafi i le tuua ai o le aoga a o savali i lona aiga i luga o le auala i South Titirangi lea na tupu ai.
Ua lipotia o le avetaavale pe ā ma le 50 tausaga o lona soifua ma o se alii papalagi.
Na muamua taumafai le tamā o loo sue e leoleo e faatalanoa le tamaitai aoga, mulimuli ai mau i lona lima ma taumafai e toso atu i totonu o le taavale.
Na malosi le tetee a lē na aafia, ma ina ua mamulu na tamoe ai loa i lona aiga.
O loo sue nei e leoleo le taavale lanu paepae, ma e lē gata i faasalalauga ae o le taumafai e saili aiga tuaoi e iai ni a latou camera i fale.
Ae i le aoga maualuga o loo aoga ai lē na aafia o lea foi ua galulue ma le aiga i auala e lagolago ai.
O le faamanatu mai leoleo i fanau aoga, afai e savavali i aiga taumafai e sue nisi e savavali faatasi.
