O ni faamatalaga a le Pule Faatonu le Regulator, na ia faia i lē sa avea ma taitaifono o le komiti faatonu o le faalapotopotoga o le malosi tau eletise le EPC, ma i latou sa avea ma sui o le komiti ua latou molita’i i le faamasinoga ia tala, e ala i se su.

O le Pule Faatonu le afioga Lematua Gisa Fuatai Purcell, ma le nusipepa o le Samoa Observer na latou lipotia tala ua mafua ai le su, o loo tuuaia i le talosaga ua faaulu e Fia’ailetoa Pepe Christian Fruean ma i latou sa avea ma sui o le komiti faatonu a lea faalapotopotoga a le Malo, e aofia ai Nuulopa Pereira Hill, Vaai Simon Potoi, Fuimaono Beth Onesemo, ma Tuautu Ross Peters.

Ua tuuina atu e le loia a le Pule Faatonu se talosaga e taofia ai le moliaga ua faasaga i le afioga Lematua Gisa Fuatai Purcell poo le strike out motion, ma ua tolo ai mo le isi lua vaiaso e tapena atu ai se tali a le itu ua faauluina le tagi faasaga i le talosaga o le strike out motion.

O le avanoa lea ua tuuina atu i le loia a le itu tagi e tuuina atu ai nisi faamatalaga auiliili mo le silafia e le loia o loo tulai mo le nusipepa o loo molia foi i le mataupu lenei.