O le pagota o Va’ai Panapa lea na sola ese ma le falepuipui i Tanumalala i le taeao o le Aso Sa na te’a nei, ae na toe maua i le vaveao o le Aso Lua o le vaiaso nei, o se tasi o pagota sa faatuatuaina i le faia o feau ma isi galuega i totonu o le falepuipui.
O le mafua’aga lea na tofi ai e o ma nisi o pagota e fafai mai fualaau’aina i le faato’aga o loo i fafo mai o le falepuipui mo le gasesega o mea’ai a pagota i le Aso Sa ua mavae atu nei.
Ae o le faamatalaga a le Sui Komesina le susuga Papalii Monalisa Tia’i Keti i le nusipepa o le Samoa Observer, o le avanoa lea na sola ai ma Va’ai Panapa.
Ua faailoa ai foi e le Sui Komesina e lē mamao le falepuipui ma le nofoaga na toe maua ai le pagota ina ua alu le sa’iliga.
O le va o le 1 ma le 2 o le vaveao o le Aso Lua na toe maua ai Va’ai ma toe faafoi i le falepuipui.
O le lua a’i lea o ni gaioiga ua mafai ona sola ese ai se pagota mai le falepuipui i Tanumalala na tatala aloa’ia ma amata faaaogā i le masina o Iuni o le tausaga e 2019.
O le masina o Mati o le tausaga na sosoo ai 2020 na tula’i mai ai le sola’aga tele a pagota mai le falepuipui fou, lea o loo faamauina e 29 pagota na sosola ese ai.
Na vave gaioiga a leoleo ma i latou sa galulue i le to’ese ma toe maua uma ai.
O le sola’aga lea na mafua ai ona toe tuufaatasi le matagaluega o leoleo ma le pulega o falepuipui.
Peitai o loo iai se isi fuafuaga a le faigamalo o iai nei e vavae ese le pulea ma le vaaia o galuega tau falepuipui i lo tatou atunuu.
