Ua fa’amaonia e le Matāgaluega o le Soifua Mālōlōina le pesia ai o i latou fou e 644 mai le mamalu lautele o le atunu’u i totonu o lenei 48 itula mai le itula e 2:00 i le aoauli o le Aso 24 Aperila 2022 i le itula e 2:00 i le aoauli o le Aso 26 Aperila 2022.
I lea numera faaopoopo ua oo atu ai le aofai ua aafia talu ona sao i tua le faama’i i le Aso 17 o Mati i le to’a 8,923, e to’a 19 i latou o lo’o taofia i le falema’i ma le to’atasi o lo’o i le potu tigāina poo le ICU i le falemai Motootua.
O le aofa’i o e o lo’o faigaluega i luga o le uafu fa’avāomālō i Matā’utu (Port of Entry) sa pesia e 72 e aofia ai ma se gasegase fou e to’atasi na fa’amauina i totonu o lenei 48 itula.
O loo tumau pea le aofai o i latou ua maliliu ona o le faama’i i le to’a 16 ma o nisi o ripotia na faailoa ai o i latou nei o tamā matutua uma. O le tama 73 tausaga le matua ua uma ona tui puipui e lua ae le’i faia le tui lona tolu poo le booster. O le isi tamā matua 76 tausaga le soifua e le’i faia le tui puipui koviti-19 ma le tasi o tamā 70 tausaga le soifua e tasi lona tui puipui ua mae’a.
