E to’a 16,862 i latou ua resitala e palota mo faigapalota laiti e 7 o loo loma nei a itumalo lea ua toe foi e saili a latou sui faipule.
E le’i faamaonia mai e le afioga i le Fofoga Fetalai Papalii Li’o Taeu Masepau poo afea tonu o le a faataunuu ai nei palota laiti peitai e le’I taofia ai le agai o le Ofisa o le Faigaploata e faia tapenaga mo lea faamoemoe.
Taua e le Komesina o Faigapalota afioga Faimomatumua Mathew Lemisio i se faatalatalanoaga ma le Samoa Global News “ E lei taulimaina e le Ofisa se tusi faamaonia aloaia i aso o palota laiti mai le Fofoga Fetalai peitai ua amata tapenaga ma fuafuaga a le Ofisa mo le lava tapena”.
Na ia taua foi o le a agai foi e Ofisa e faatino lona tiute o le logoina o le mamalu o le atunuu i le taimi e tuu atu ai e le Fofoga Fetalai se tali mautu.
O le lola palota a Samoa na tapunia i le 128,848 i le palota tele a le atunuu na faia i le masina o Aperila o le aofai lea o i latou na resitala mo
le palota tele ma o le 7 itumalo faapalota lea o le a fai a latou palota laiti o le 13.1% mai le aofai o tagata palota i totonu o le atunuu.
I le aofai e to’a 16,862 ua resitala e palota mo le palota laiti e to’a 1,103 e agavaa e palota muamua (pre-polling) o le a faatautaia i nai aso ao loma ai le palota laiti.
