Ua loa ona silafia e le toatele le tulaga o loo iai nei faigamalo faatemokarasi a Samoa i le taimi nei ma ua tele foi tagata e iai le tomai faapitoa i mataupu tau i le tulafono ua faaali o latou manatu i le malelega a le Ao o le Malo na fai i le Aso 4 o Iulai faatasi ai ma le faaiuga a le faamasinoga i le Aso 28 o Iuni 2021.
O se tasi o nei tagata e iai le tomai faapitoa o le alii QC mai Niu Sila ia John Upton. O John Upton ua leva foi ona galue auaufaatasi ma le malo o Samoa ma lona faavae. Taua e John o le faamasinoga e faia le faaiuga mulimuli i mataupu tau i le faavae e le’o le Ao o le malo poo le Palemene.
O le taimi nei lea ua tulai mai aofaiga o sui o vaega fauapufai i le 26 le FAST ae 21 le HRPP (20 i le taimi nei ona ua faamavae Nonu Lose Niumata mai le tofi ae agai e toe fai le faigapalota laititi) ae loo faagasolo pea isi faamasinoga o tagi o le faigapalota.
Taua e John Upton i le Midday Report “o le palemene e faia tulafono ae o le faamasinoga e faauigaina, ma i lea mataupu o lea na manino le faauigaina e le faamasinoga lea na tuumai ai lana faaiuga ina tauaofia le Palemene i totonu o le 7 aso”
Manatu le alii Loia QC “e manaomia le talia e le Ao o le Malo o fautuaga, peitai o fautuaga lea o loo tuuina atu ia Tuimalealiifano e le’o ni fautuaga lelei, ou te mautinoa e matua’i sese lava”.
Na ia taua foi ua tatau ona nofoia loa le fono aoao a le malo “E taua tele le usuia loa o le palemene aua e tatau ona pasia le tala faatatau autu o le tupe, a leai se tala o le tupe o lona uiga o seleni uma o loo faaogaina i le taimi nei e lē faatulafonoina”.
O le talitonuga a John Upton ua tatau ona toe fai se isi iuga a le faamasinoga e ono faaoga ai loa le faatautoga na fai i lalo o le faleie a le FAST ma o loo i le faamasinoga le malosiaga e faia ai lea faaiuga pe a iloa e talafeagai.
