Search
Search
Photo Credit: Ministry of Health

Sauniga faafetai a le Matagaluega a le Soifua Maloloina

A o tau lalata ai le faaiuiu o feau ma galuega o lenei tausaga ma o le autu foi lea o lenei vaitau o aso fiafia, o le agaga maualuga foi lea o le Minisita ma le Matagaluega a le Soifua Maloloina e ala i le faafoeina o la latou sauniga faafetai.

O le Minisita o le Matagaluega, Afioga Valasi Luapitofanua Toogamaga Tafito Selesele na saunoa e tusa ai o lenei faamoemoe.

“E mafai ona ou faapea o le taeao lenei o se taeao o le ola fou, o se aso sa fau ao fau po, ma sa lilo foi i o outou finagalo ma so matou manatu e tatou te aulia mai ma le manuia.”

“O le asō e tatou te molimauina ai le faamoemoe ola, i le tele nauā o le agalelei o le alofa o le Atua i o tatou tagata.” 

“Ua ou tulai atu i le ava ma le faaaloalo e fia faaaogāina ai lenei avanoa faaauro e faaleo ai le agaga faafetai ma le loto faagaeetia tele, i auaunaga eseese o le matagaluega ona o le galuega fitā sa gapatia ai.”

“O le faafetai faapitoa mo le Aufaigaluega uma o le Soifua Maloloina i soo se matātā ma soo se agavaa o loo tautua ma auauna ai.” 

“E amata mai i Faauluuluga i susuga i Alii Pule Sili, le mamalu i Pulega, susuga i alii ma tamaitai fomai, susuga i alii ma tamaitai tausi soifua seia oo atu lava i le mamalu o avetaavale, le au gāsese poo i latou o loo nafa ma le tapenaina o meataumafa mo gasegase, le au su’isu’i, le vaega o leoleo po, ma i latou uma o loo nafa ma le faamamāina lautele o soo se vaega ma nofoaga o loo faatino ai galuega faalesoifua maloloina. “

Na ia faailoa foi nisi o vaega tāua i le savaliga a le Matagaluega i soo se vaega. 

“E talitonu o le agaga moni lea o loo i le Afioga i le Tamaitai Palemia ma le Faigamalo, ina ia laugatasia, ia tutusa ma ia limataitaiina ona tagata faigaluega uma i ana taiala ma faiga faavae e tusa ai ma le tulafono i lalo o Pulega a le Komisi o Galuega.”

E lei faagaloina foi le sao tāua o faalapotopotoga tuma’oti.

“O le a lē faagaloina foi le sao tāua o faalapotopotoga tuma’oti o loo galulue faatasi i faiga faapaaga ma le Matagaluega o le Soifua Maloloina.

“E lē gata i galuega faatino ae o le feau e taumolimoli atu i nuu i tua ma le atunuu atoa, mo le faatumauina pea o le Soifua Maloloina lelei o tagatanuu o Samoa.” 

Ua faamalo faafetai mo la outou auaunaga faifai pea.

“Le Matagaluega e, afai sa o tatou lototetele i le faatinoina o a tatou galuega i lenei tausaga ona o le faatasi mai o le Alii, aisea tatou te lē toe faafoi ai le viiga ma le faamanū i lona suafa.”

Tala sili ona faitaulia

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required