Ua maea ona saini se maliega e le taitai o le malo i le Palemia ma se sui o ni falemai se lua mai le atunuu o Initia i le fuafuaga e ave iai gasegase mai Samoa e le mafai ona togafitia i lo tatou atunuu.
O se maliega o le a mafai ai ona aumai e ia falemai ni fomai e faia i Samoa nisi o togafitiga mo gasegase e pei o le fatu ma faaitiitia ai tupe faaalu a le malo.
Ua faailoa e le Minisita o le Soifua Maloloina o loo sili ona taugofie le ave o gasegase e faia togafitiga i lea atunuu ae taugata tele Niusila lea o loo ave foi iai nisi o gasegase.
E pei ona silafia o loo tapena nei e le malo se tasi o fuafuaga o le polokalame o le inisiua o togafitiga faafomai i fafo e pei ona faagaioia e le faalapotopotoga o le NPF, ma o se polokalame o loo silasila le malo e mafai ona fesoasoani i le faatupeina o togafitiga i fafo.
