O lea na pepelo le sa avea ma sui faipule a le National, Jami-Lee Ross ina ia tauleagaina ai le sa taitai i le latou pati, Simon Bridges.
O le tautinoga lea a le loia o loo tu mo Ross i luma o le faamasinoga maualuga i Aukilani a o iloiloina ai tuuaiga o loo molia ai le faipule ma le isi toaono i foai tupe sa faia faaalatua.
O lea na ave e le ofisa ua taua o le Serious Fraud Office i latou nei ona o le taumafai e vaevae foai tupe tetele na foaia e le gata o le National ae o le Labour ina ia aua ai nei maua i faamaumauga le na alu atu ai le foai.
A o tulai ai le alii loia na ia taua o le le fiafia lava o Ross i le le siitia o lona tulaga i totonu o le pati e Bridges ma iu ai ina aveesea faamalosi ia ma le National, o le mafuaaga lea na pepelo ai ia Ross.
O lea ua uma le fitu vaiaso o iloilo lenei mataupu ma ua faatali se faaiuga a le faamasinoga.
Ae pe a toe tepa i taimi na faaleaga ai e Ross le sa taitai Simon Bridges, o ni pepelo ua toe tautino nei ae o lea na matuai iloga ona aafia ai Bridges faapea le pati i lea taimi.
