O le mea moni e lē o mafai e le buyout scheme o loo toe faatau mai ai e le puleganuu a Aukilani fale na faaleagaina e lologa ona totogi uma ai aitalafu i luga o fale nei.
Ua toe molimau se tasi o tagata e iai lona fale i Aukilani i Sisifo e tusa lava pe faatau e le puleganuu lona fale lea ua lē mafai ona toe nofo ai, e uma ane lava e totoe le aitalafu e $100,000.
O le tali a le sui o le puleganuu, e lē mafai e le puleganuu ona tali uma faafitauli ma totogi uma aitalafu faapea mokesi i luga o fale ua faaleagaina i Aukilani, ma i lipoti a le 1News e na o le 95% o le tau o le fale lea o loo oo iai le maualuga o le tupe e totogi mai e le puleganuu mo fale o loo inisiua.
Ua fai mai ai le sui o le puleganuu o ia foi o loo ta’ita’ia le Auckland Council Recovery’s Office Craig Hobbs, o loo toe talanoa nei le puleganuu faapea le malo i se auala e fesoasoani ai ia i latou nei.
I faamaumauga a le CoreLogic e i lalo mai o le 30 le aofai o tagata e iai fale i Aukilani o loo mafatia i aitalafu o mokesi e tusa lava pe faatau e le puleganuu fale.
Ae mai le minisita o le Emergency Management and Recovery, Mark Mitchell, o le faafitauli lea e pa’ū i le puleganuu.
Puna o Faamatalaga: Work underway to support homeowners facing debt under flood buyout scheme (1news.co.nz)
