Ua tuu avanoa le faamasinoga faaitumalo i le itu a leoleo e tapena lelei ai se latou folasaga e faailoa ai se latou fautuaga i se faasalaga talafeagai e faia i se Alii 37 tausaga le matua.
O lenei alii e mai le afioaga o Leulumoega Tuai ma na faia ni faamatalaga i luga o le Facebook ma faamata’u ai le saogalemu o se alii ma se tamaitai faamasino sinia o le faamasinoga Sili a Samoa.
O
faamaumauga a leoleo o loo tuuina atu i le faamasinoga e faailoa ai o le Aso 27 o Aperila na faasalalau ai e lē ua molia lea faamata’u i le fesootaiga o le Facebook.
O ia faasalalauga ua faaalia e leoleo na faatupu ai ni atugaluga ma ni lagona lē mautonu i faamasino na faailoa o la Suafa i lea faasalalauga i auala o fesootaiga faaonaponei.
O le alii o Iakopo Falefatu o le isi ona igoa e iloa ai o Telea Fou na tulai i le faamasinoga faaitumalo i le Aso Lua 24 o Aukuso mo se faasalaga a le faamasinoga peitai o le silasila a le tamaitai faamasino le afioga Alaalatoa Rosella Papalii e ogaoga le solitulafono ua ioeina e Iakopo.
O lea na ia taua e manaomia ai se folasaga a leoleo e ala mai lea i le Ofisa o Loia Sili a le Mālō e faailoa ai ni mataupu ua maea ona fai iai ni faaiuga na molia ai nisi tagata i le faia o ni solitulafono faapea e agai ini faamasino o isi atunuu ona fuafua lea iai o se faasalaga.
E 5 tausaga e nofosala ai i le falepuipui le faasalaga maualuga o loo aiaia i lea solitulafono. O le Aso 22 o Novema o le a lau ai se faasalaga o Iakopo Falefatu poo Telea Fou o Leulumoega Tuai Sa galue i le Matagaluega o le Tiute poo le Tupe Maua i le taimi na Ia faia ai le siliva tulafono, o le taimi nei ua faamālōlō.
