Tusia: Maina Vai 

O nai itula a’o le’i tapunia le atunuu ona o le tapulaa ma aiaiga o le Level 3 ua oo iai Samoa i le tulaga o tagata ua maua le faamai o le Koviti19 . Na vaaia le nanati o le atunu’u e fai faatauga, ma utu taavale  aua aso e lua o le a tapunia ai. 

Sa faatumulia taavale i so’o se supamaketi agai mai Apia i le taulaga e oo i nuu i tua. E le gata i lea a’o laina taavale i pamu penisini ae sa iai foi nisi o pamu penisini e afe atu ua tapuni ona ua leai se penisini e utu ai taavale. 

O le  taeao ananafi na logoina ai le atunu’u

e ala i le saunoaga  faalauiloa a le Tamaita’i Palemia o Samoa Afioga Fiame Naomi Mataafa o le a tapunia Samoa mo i le 48 itula amata mai i le ta o le 6 i le afiafi ananafi seia paia le 6 i le afiafi o le Aso Gafua. 

E le’o toe po se lilo i le atunuu le faigamalaga a le vaalele na taunuu mai ma le pasese e 73 mai Brisbane i Ausetalia, lea na maua ai le toa sefulu tagata ua iai le vairusi o le Koviti19. 

O lea numera na suia mai lea i le afiafi o le Aso Faraile i le 15 i latou ua aafia.

O i latou uma nei o loo faanofoesea ise vaega o le Falemai i Motootua. 

Na uluai faalauiloa ai e le Tamaitai Palemia o Samoa i le fono a le Palemene a’o lei taape lea tulaga ma le faaono tapunia ai o Samoa.

O le taeao analeila sa toe fono faatopetope ai le Kapeneta i  se tonu o le taimi e tatau ai ona tapunia uma Samoa. 

O vaaiga i le nanati o tagata e fai faatau o loo iai lava ise tulaga faateia ma faavavevave. 

O laina i fale e faatau ai le iunite mo le power sa i se vaaiga e le masani ai laina ma le laulaututū o tagata. 

E ta ane lava le 6 o molimauina pea le feoai o nisi taavale, sa vaaia fo’i le taumafai atu o leoleo e aveese i latou faatau oloa i tafā ala. 

O supamaketi sa vaaia le tumutumu e leai se faleoloa Saina na gaogao a’o faatauga lava o taumafa aua aso nei e lua. 

O nisi sa talanoa atu iai na o latou faaalia e faapea na’o nai faatauga laiti lava ona ua leva ona tilotilo i le faama’i ma ona aafiaga i isi atunu’u, peitai o nisi na matua faateia lava, ma lalafo lagona faanoanoa i lenei faama’i ona e fai o le faafuaseia o le tapunia ai o le atunuu, ae o le faanoanoaga sili e oo mai ae augapiu mase seleni i le taga. 

O loo maloloina pe i latou o faanofoesea ae o loo ua faanofoesea foi le aufaigaluega e silia i le 200  sa galulue i le taunuu mai o le vaalele mai Ausetalia i soo se auaunaga i le malaevaalele i Faleolo.