Na faafetaia sui o le tinei mu i Samoa ma nisi o le aufaigaluega na lavea’iina mai soifua o le tusa ma le 75 lea sa i luga o le vaa a le navy a Niu Sila lea ua mu ma magoto i gataifale o Upolu.
O le vaa lenei o le Manawanui e tusa ma le $100 miliona lona tau, ma o le po o le Aso Toonai na pa’ulia ai mulimuli ane ua mu ma magoto i le taeao ananafi.
E lei faigofie galuega lavea’i i le po o le Aso Toonai ona o le pogisa faapea ai ma le loulouā ma i lipoti e faapea e na o le to’alua lea na auina atu i le falema’i mo togafitiga.
Ua faafetaia ai e le Palemia o Niu Sila, Christopher Luxon galuega lavea’i a le aufaigaluega i Samoa aemaise e lei faigofie le taimi na tupu ai.
I nisi o lipoti o loo maualuga le tulaga masalomia o le liki o le suāuu mai le vaa a le navy lea ua mu ma magoto.
E tuufaatasia tala o le taeao o loo faatali se isi tala o le vaalele o loo fuafua e alu i Samoa e aumai ai tagata sa i luga o le Manawanui.
Ae mai le minisita o puipuiga a Niu Sila Judith Collins, e lē o tele sana tala pe faamata o iai se inisiua mo le Manawanui.
Lipoti lata mai…
O se lipoti lata mai o lenei faalavelave i le taeao nei e pei ona saunoa le minisita o le puipuiga, Judith Collins i luga o le Breakfast a le One News, e foliga mai na pē le paoa o le vaa, na mafua ai ona oso i luga o le ā’au ma pa’ulia ai.
Saunoa Collins, na faailoa atu e le Pule o le Navy ia te ia, o lea ua amata faagasolo su’esu’ega a le Faamasinoga o Iloiloga, ma atonu e tele ni vaiaso o le a faagasolo se’ia oo ina maua ai se lipoti mae’ae’a o lenei faalavelave.
Puna o Faamatalaga: HMNZS Manawanui sinking: Two people treated in hospital in Samoa, commander praised in rescue effort after NZ Navy ship ran aground – NZ Herald
