Na ave e leoleo ma o lea ua molia tagata e toalua e fesootai ma le tamaitai na ave faamalosi i le po o le Aso Lua i North Shore i Aukilani.

A o faataotolia pea i le falemai lē o loo aafia mai Beach Haven, o le aoauli ananafi na saisai mai ai e leoleo le alii 32 tausaga o Dairy Flat ma le tamaitai 28 tausaga o Bayview, ma o lea na saisai mai i se tasi o fale’aiga i le taulaga i Aukilani.

O moliaga o le ave faamalosi ma le faaoomanu’a lea o loo molia ai i laua ma o le tamaitai o lea lava foi sa iai lona tusi saisai.

E lē talitonu leoleo o se mataupu na soona tupu fua, ma o lea o loo faaauau ai pea suesuega i Beach Haven i le vaiaso nei.

O lea foi ua faamaonia mai e leoleo o le tamaitai na mulimuli maua i Greenhithe ma ona manu’aga o ia lava lea sa i le fale i Beach Haven.

Mai tagata o loo nonofo i lea vaega o North Shore, ua lagona le lē saogalemu ona o le mea na tupu faatasi ai ma nisi o mataupu e lei mamao atu foi.

O le asō e tutulai ai le toalua ua molia.