Ua ave e leoleo le faitau afe o tupe taufaasese, fake cash mai se nofoaga o iai ni laau maruana i Aukilani.
Ua faailoa mai e leoleo o se alii e 29 tausaga le matua o le a tulai i le faamasinoga i le asō ina ua maua ma se fana ma pulufana i se tuatusi i Pukekohe.
Na pueina le tagata lea i le mae’a o se suesuega a leoleo sa faia i le masina na tea nei e pei ona faailoa mai ia latou faamatalaga ma ua molia le tagata lava lea i moliaga e faatatau i laau faasāina ma le tuuina ane o ni faamaumauga taufaasese.
Saunoa le leoleo satini o Tod Kirker na iai ni lipoti o tupe taufaasese ia mai le komiuniti i Aukilani i Saute ma faia ai loa le suesuega.
Na o latou maua atu ai i le nofoaga na sueina tupe taufaasese ia ua mae’a ona lomia mo le faaaogāina i le komiuniti.
Ua faamatuu ane ai ma ni fautuaga mai leoleo i tagata ina ia mataala i tupe taufaasese ia ne’i faaseseina ai i latou.
