O le maualuga o le tulaga ua oo iai le taaloga siisii u’amea mamafa i Samoa, ma le lelei o le nofoaga o loo koleni ma a’oa’oina ai le taaloga i lo tatou atunuu, o nisi ia o mafuaaga o le manumalo o le ofo a Samoa, e aumai le nofoaga e a’oa’o ma koleni ai le siisii u’amea mamafa i lo tatou atunuu.

Ua faailoa e le Pelesetene o le taaloga siisii u’amea mamafa lea laasaga fou ua oo iai le taaloga, ma le naunauta’iga ia faalauiloa aloa’ia le faatūina o lea nofoaga poo se Institute a o lei mae’a le tausaga nei.

O le malo o loo silasila iai le asosi siisii u’amea mamafa a Samoa e lagolago atu i le faatūina o le nofoaga, ae o loo faia foi feutana’iga ma faalapotopotoga o le taaloga lenei i le lalolagi i se fesoasoani e maua mai ai mo le faatūina lava o le nofoaga.

Faaalia e le afioga Tuaopepe Jerry Wallwork le pelesetene o le taaloga siisii u’amea mamafa a Samoa, o se nofoaga o le a aumai iai tagata siisii o atunuu o le Oceania e tausinio i taaloga tetele faavaomalo e pei o le Olimipeka e a’ooga ai.

Faaalia foi e Tuaopepe Jerry Wallwork o atunuu malolosi e pei o Niu Sila, ma Ausetalia sa tuuina atu a latou ofo e faatūina ai le nofoaga poo le Institute, peitai na manumalo le ofo a Samoa.