O le malaga i Farani, nofo i le faletalimalo, ma maua le pepa ulufale e maimoa ai i le sailiga o le siamupini o le Ipu o le lalolagi i le taaloga i le va o le OIopeleki ma le Springboks a Akerifa i Saute, ua faamanuiaina ai se tina talavou 27 tausaga o le soifua mai le nuu o Tuanai.
O le faalauiloa a le kamupani telefoni o le Vodafone ua manumalo ai lea tina o le a malaga i Farani i le Aso Lulu o le vaiaso nei, ma le faamoemoe e toe taliu mai i le masina o Novema pe a mae’a le sailiga o le siamupini o le ipu o le lalolagi i le lakapi.
Ua faailoa e le tina o Jamalieh Pereniseaila na faatau lana Iphone mai le Vodafone e lima afe tala le tau ma le lilo ia te ia, o le a fanau mai ai se faailoga ua faaluaina ma sili atu se tupe e maua ai.
E le gata o lana pepa malaga i Farani, ma le faletalimalo e nofo ai faapea le pepa ulufale mo le taaloga, ae e lua afe tala Amerika le seleni mo ia e faaaogā poo le pocket money.
