O lea ua aumai aloaia nei i se tulaga faalauaitele se faasalalauga mai le Matagaluega o leoleo falepuipui ma toe fuataina, ua talosagaina ai le fesoasoani a le atunuu ia latou sailiga o loo faia e maua ai se alii ma ni tamaitai se toalua mo se suesuega o loo faagasolo.

E le o faailoaina e le matagaluega poo le ā lea suesuega, ae ua faailoa i le latou faasalalauga o Fauena Leautuli Toese Su’a poo Samuelu Sam Simiko e iloa ai e le toatele 41 tausaga o Tafaigata, Sapulu Salelologa ma Tanugamanono, o se tasi lea o le toatolu o loo manaomia mo ia suesuega.

O tamaitai e toalua o loo aofia ai i lea sailiga a leole o Marie Tusi Kepi poo Koteen 20 tausaga le matua o Tanugamanono ma Saasaai, ma Sivai Kepi Mamea poo Ruby e iloa ai e le toatele e 39 tausaga o lona soifua.

O Sivai e mai afioaga o Saasaai, Vaitele, Satupaitea, Papa ma Malololelei.

Ua ave le faatalauula a le matagaluega o leoleo i le atunuu i le fia maua o i latou ia e toatolu ma le lapataiga, o se solitulafono le faalafi o se tagata o loo aafia i ni tuuaiga tau solitulafono.

E ui e le o faailoaina e leoleo poo le ā le suesuega o loo manaomia ai i latou ia e toatolu, peitai o loo manino i le suafa o Samuelu poo Sam Simiko o loo iloa ai e le toatele lea alii, o le faalavelave tau taavale na maliu ai Tuuau lea ua tolu tausaga e lei maua lava e leoleo poo le taavale a ai a o ai le avetaavale na mafua ai lea faalavelave, le mafuaaga o suesuega o loo faia nei e leoleo.