Ua savali nei i le lua masina o taofia pea i le vaaiga a leoleo i le falepuipui i Tanumalala ni alii se to’aono o loo tuua’ia i ni solitulafono o le umia o laau malosi faapea le umia o nakoti poo pauta faasāina.
O le to’atasi o i latou e le’i oo atu i le valaauga o o latou moliaga ma ua poloa’ina le tusi saisai e sa’ili ai, ma a maua ia loka ma taofia e faatali ai le isi valaauga o le mataupu.
O alii e to’alima o loo faaauau pea ona nonofo taofia ua faatonuina e le faamasinoga loia mo i latou e to’atolu e faaulu atu talosaga tusitusia mo le tatala i tua i ni aiaiga, ae o isi alii e to’alua e leai ni loia ua faatonuina e avatu ni a la talosaga tusitusia e tatala ai i tua.
O le to’alima lea ua aofia ai Tagaloa Maugaloto Palu, Taamilo Faioso Su’a, Lemalu Rudy, Brian Vaifale, Seugalii Fotuletausaga Levao, ma Tulitau Sopo Dion Rudy o loo sa’ilia i le tusi saisai.
O le Aso Gafua aso 17 o Fepuari e toe fofogaina ai moliaga o i latou i le Faamasinoga Maualuga.
O se osofa’iga a leoleo i le sailia o nofoaga o loo faatino ai solitulafono o le umia o nakoti na molia mai ai i latou uma nei.
