O le auai atu o le usugafono a Samoa i le fono lona 112 a le Faalapotopotoga Faavaomalo o Leipa le International Labour Organisation, lea sa usuia i le aai tele o Sineva poo Geneva, i le atunuu o Suiselani i le atu Europa na saini ma talia ai e Samoa feagaiga faavaomalo e lua a lea faalapotopotoga e patino lana auaunaga i mataupu eseese e aafia ai galuega ma tagata faigaluega.

Ua talia nei e Samoa le feagaiga e faasino i le siitia o le faavaa o le saogalemnu ma le soifua maloloina 2006 (Promotional Framework for Occupational Safety and Health Convention 2006) ma le feagaiga faavaomalo e tetee atu i sauaga ma gaioiga taufaifai ma taufaafefe le Violence and Harassment Convention o le tausaga e 2019.

O le faamautuina o le talia ai e le tatou atunuu o ia feagaiga faavaomalo e lua na saini ai le ta’ita’i o le Malo le afioga i le Palemia, ma sa tauaao atu e le Minisita o Leipa le afioga Leota Laki Lamositele Sio sa ta’ita’ia le usugafono a Samoa.

O ia feagaiga o le a unaia ai e le tatou Malo le faatāua o le tulaga o galuega ma le saogalemu faapea le soifua maloloina aemaise o le tetee atu i sauaga ma faiga taufaifai ma taufaafefe i totonu o galuega.

O isi sui o le usugafono a Samoa o le sui o le Samoa National Tripartite Forum ma le Workers Association le faletua o Seve Saina Tomi Setu Fetalaiga, faapea le sui o le faalapotopotoga ae o loo faafaigaluegaina tagata le Employers Association, susuga Funefeai Oliver Vaai, o se ofisa sinia o le Matagaluega o Alamanuia Pisinisi ma Leipa o Cedrela Tamati, ma le sui o le Malo o Samoa e faamautu i Sineva le afioga Toleafoa Nella Pepe Tavita Levy.