Ua tea i tua mai le falemai alii e toalua lea na faaoolima iai nisi o taulelea i luga o le auala i Pesega i le vaiaso na tea nei.

Ma e lei iai foi nisi ua molia e ui o loo ua silafia e leoleo i latou na faatinoina le faaoogalima.

O le ata na agiga i luga o upega tafailagi o loo manino mai ai, faaoogalima matuiā a nisi o alii e silia ma le toalima na faia i isi alii e toalua i luga o le aualatele i le taimi o loo pisi ai le auala.

O gaioiga o le fasi ma takiki ma na taatitia ai lava ia taulelea i luga o le auala, ae faafesootai e le mamalu o le atunuu sa iai i lea taimi le 911 le numera fesoasoani mo se laveai.

Na faailoa mai e le Komesina o Leoleo, ua taulimaina foi e leoleo le numera o le taavale na iai i latou na faatinoina le soligatulafono

I faamaumauga e faapea sa lafo e i laua na aafia upu masoā ia i latou na afua ai le faaoogalima.

Na taunuu atu le Pulega o Tineimu ma faatino a latou fesoasoani ma auina atu ai i laua i le Maota Gasegase mo togafitiga.