Ua folasia i le tauaofiaga a le Palemene i le Aso Lua o le vaiaso nei se finagalo o le taitai o le Itu Agai, susuga Tuilaepa L Sailele Malielegaoi, ua ave ai lana faamalo ma le faafetai i le Minisita o Puna’oa Faalenatura ma Siosiomaga le afioga Toeolesulusulu Cedric Schuster, i lona teena o tala’iga sa tuuaia ai le faigamalo ua mavae, i lo latou faatau atu i le Malo ma nisi o tagata Saina o fanua faaleaganuu.
O le talanoaina o le lipoti a le komiti faapalemene mo le Matagaluega o Puna’oa Faalenatura ma Siosiomaga ua iai ma le vaaia o eleele uma o le Malo ma le lesitala o le lisi o fanua faaleaganuu, na saunoa ai le taitai o le Itu Agai.
Sa faafetai ai Tuilaepa i le komiti faapalemene e taitaifono ai le faipule o Saleaga Tasi le afioga Fepuleai Faimata Su’a, i le leai o se faamatalaga o ta’ua ai ua faatau ni fanua faaleaganuu i le taimi o lana faigamalo.
“Lau afioga i le Fofoga Fetalai ou te tilotilo atu i le lipoti lea 2019 ma le 2020, o le manaia ia o la’u saini lea e iai.
O se taimi puupuu a lea ina ua see ese Fiame ona ou tauavea lea o le matagaluega, ae o le mea ou te fiafia ai ou te alu atu i totonu e leai se mea o faaletonu, o la e lelei a mea uma.
“Sa ou fia suea ia molimau ia sa ave, ua faatau e le Malo lenei, lona uiga ua faatau e Fiame ia fanua faaleaganuu i Saina.
“E leai ma se mea faapena na tupu, ae o lipoti na sa ave i fafo.
“Lea la ou te fiafia ai e leai se mea faapena o aumai i le lipoti lenei.
“Ma ou te talosia ia i latou o faia pea ia pepelo ia aua ne’i outou faia ni tala faapena, e leai a ma se mea faapena, ma ua ou fiafia foi ua tulai atu le minisita ua iai nei ma ua ia toe faamauina le mau lea e leai a se mea faapena na tupu, o le faatau i le Malo o Saina o ni fanua faaleaganuu”… o se vaega o le saunoaga a le taitai o le Itu Agai i le Palemene a o talanoa le lipoti a le komiti faapalemene.
Na faailoa ai foi le faafetai a le susuga Tuilaepa i le leai o se moni o ni tala’iga ma ni lipoti sa ta’ua ai taimi o lana pulega malo sa tele ai miliona na maua i le faatauina atu o kasa kaponi.
Na tali le taitaifono o le komiti le afioga Fepuleai Faimata Su’a ma ia faamanino i le taitai o le Itu Agai, e lei afea i suesuega a le komiti ni faatauga fanua faaleaganuu e pei ona afea i lona finagalo.
Na faailoa foi e se sui o le komiti i le Palemene le sui Faipule o Vaimauga Numera Tasi o le leai o se faamatalaga i le latou lipoti o afea ai ni eleele faaleaganuu ua faatau, o se faamaoniga lea o le tausisia pea o le Vaega 102 o le Tulafono Faavae o loo tapu ma faasā ai ona faatau ese atu ni eleele faaleaganuu.
