O le malosiaga a le Ao o le Malo na matuā fesiligia i totonu o le potu faamasino i le amataga o le vaiaso a’o fai ai finauga a Loia o itu e lua i le mataupu o loo iloiloina pe e faatulafonoina le faatautoga na fai a sui o le FAST i le Aso 24 o Me 2021.

O le alii Loia mai Niu Sila o loo tulai mo le itu a le FAST ia Benjamin Keith na finau i lana folasaga ma fesiligia ai pe aisea o le a faaleaogaina ai le faatautoga na fai.

O le Loia Sili lea na tuu atu lea talosaga i le faamasinoga o loo tumau pea i le mau o le faatautoga lea na fai i fafo o le falefono e lē faatulafonoina.

Tali Keith “O le lē auai o le Ao o le Malo i le fono Aoao faitulafono e lē faatulafonoina”, “E leai se malosiaga i le Ao o le Malo e faatuai ai le tauaofiaga o le Palemene i tua atu o le Aso 24 o Me”, “Ua uma ona tuu mai le tali a le faamasinoga e leai se malosiaga a le Ao o le Malo e faatuai ai le tauaofiaga o le Palemene”.

Taua e Keith o le Ao o le Malo ma le Failautusi o le Fono Aoao Faitulafono o i laua ia e le’i auai i le faatautoga ae sa tatau ona usitaia faaiuga a le malo filifilia. “I le faavae o Samoa e leai se malosiaga a le Ao o le Malo e lē talia ai filifiliga o le malo fou ma e leai se malosiaga e taofia ai faaiuga o faigapalota”

O lana finauga e lagolago ai le faia o le faatautoga i lalo o le vaega ua taua o le ‘NECESSITY” e faapea ona o gaioiga uma na faia ina ia taofia ai tauaofiaga o le Palemene ona ua le faia tiute a nisi o sui o le malo”.

I se faamauamuga na tuufaatasia e Taulapapa Brenda Heather Latu ma Fiame Naomi Mataafa lea na fua agai iai le finauga a Keith ma faailoa ai “o tagata uma ia e lei auai i le tauaofiaga e leai ma se tasi o i latou e iai se malosiaga e taofia ai fua le Palemene”.

O le faaiuga a le faamasinoga maualuga i le Aso Faraile 21 o Me 2021 e tatau ona faataunuu ai le faatautoga i totonu o le 45 aso talu ona mae’a le faigapalota a Samoa ma o le Aso 24 lea o Me.

O le finau la a le FAST o le faatautoga na faia e tauala i aiaiga o le faavae, o se finauga ua taua o le “principle of necessity”.
Taua e Keith “o le tauaofia o le Palemene i le aso 24 o Me e le’o se tulaga masani ma e iai aafiaga ae peitai o se gaioiga talafeagai lelei ma le faavae”.

Na taua foi e Keith “ talu ai ona o le failautusi o le fono Aoao faitulafono lea na faatonuina e loka faitotoa o le falefono lea na afua ai ona fai i fafo, i lalo o le faleie le faatautoga”.

O le tamaitai Loia Sili e le’i auai foi i le faamoemoe ma na taua e Keith “o lana matafaioi faavae o le auai i le faatautoga ma o lona le iai e le tatau ona aafia ai fua gaiogia a sui faipule filifilia” Faailoa foi e Keith o le loka ai o faitotoa o le palemene ma le mafai ona ulufale le vasega o faamasino o se tasi lea o gaioiga lē faavaea a le failatusi o le fono aoao faitulafono.

O lē sa avea ma fofoga fetalai o loo fesiligia le faia ai o se tusi, taofia ai le tauaofiaga o le palemene i le po ae loma ai le aso 24 o Me, taua e Keith “e leai se malosiaga na te faia ai se faasilasilaga faapea”, “e le mafai e se tasi ua le’o toe tulai mai i le tofi ona taofia sui ua filifilia e ulufale i le maota fono o le Palemene”.

Ae o le finau mai le itu a le Loia Sili lea o loo tulai mai ai se loia QC mai Niu Sila ia Paul Rishworth na ia faapea “o le faavae o loo manino e na’o le Ao o le Malo e iai le malosiaga e faatautoina le fofoga fetalai o le maota”.

Na ia taua e le’i faatautoina se fofoga fetalai i le Aso 24 o Me  ma e le’i faia foi i totonu o le falefono o le palemene, “Afai ae tauaofia se palemene i soo se nofoaga lava e ese mai le falefono, e tatau ona tuu mai se tusi mai le Ao o le Malo e faailoa ai lea tulaga peitai e le’i faia e le FAST lea vaega ina ua fai le latou faatautoga i fafo o le falefono”.

Na fesiligia loa e le faamasino ia Vui Clarence Nelson kopi o nei faatonuga aua e iai le isi o tauaofiaga na faia i nisi o fale ae o loo fausia le maota fono fou o loo iai nei.

Na tali le alii loia a le Ofisa o le Loia Sili ia Fuimaono Sefo Ainuu , “o faamatalaga nei mai le tautinoga faatauto a Tiatia ae lei mafai ona maua mai faamaumauga e faamaonia ai na faia lea tulaga i le tausaga e 2016”.

Toe fesili Vui “pe ua tuu e seisi nei faamaumauga i le lapisi, o lana mau e taua tele nei faamaumauga pe afai e maua”.

Taua e Rishworth “o le aano tonu o le latou finauga o le fofoga fetalai filifilia a le FAST e lei faatautoina ao iai le Ao o le Malo e molimauina, o loo manino lea tulaga ma e lei mafai e le FAST ona faataunuuina”.

E tusa ai ma le faaogaina o le “Doctrine of Necessity” taua e Rishworth e le’i fesiligia lona mafaufau i le faaogaina o le necessity ae o le fesili pe o a aiaiga na faaogaina ai lea vaega”, “Na ia taua o le tulaga ua iai Samoa  i le taimi nei e taua tele ma e tatau i tagata faitulafono ona tulai mai”.

Na tatao atu e le fesili a Vui le alii o Rishworth “pe lavea i ia tagata faitulafono le failautusi o le fono aoao”, Na ia fesili foi pe e le’o lona mafaufau o le matafaioi a le faamasinoga le faia o faaiuga ona o le tulaga o loo iai Samoa i le taimi nei?”.

Tali Rishworth “e le’o le failautusi na mafaufau iai, ma o lana vaai o le galuega a le faamasinoga e tali fesili talafeagai o le mataupu”.

Fesili foi le afioga ia Lesatele Rapi Vaai i le itu talosaga pe na te talitonu o le tauaofia ai o le Palemene i le aso 24 e tatau”.

Tali Rishworth “ioe ma na faamaonia e le faamasinoga maualuga le faatonuga e tauaofia le Palemene i le Aso 24 o Me”.

Toe fesili lea o Vaai “a faapea na valaau e le Ao o le Malo le tauaofiaga o le Palemene i le aso atofaina, o le iuga la e tulai mai o se faigamalo fou filifilia?”.

Tali Rishworth “e le mafai ona talanoa i lea mataupu aua e ese ma le fesili o loo talanoaina”.

Peitai e lei taofia ai le naunau atu o Vaai i se tali a le Loia QC i lana fesili.

Tumau pea le tali a Rishworth “ e lē tuuina atu sa’u tali”.

Toe fesili Vaai faatatau i le maua ai o se iuga mo se faigamalo talu mai le faigapalota i le Aso 9 o Aperila ma faapea “O lona uiga o lea ua e faapea mai e leai se mafuaaga tatau mo le faamasinoga e mafaufau ai i le taua o le faatautoga?”.

Tali Rishworth “o lea fesili o le mataupu lea mo le faamasinoga e fai ai le faaiuga ma e tatau i tagata faitulafono ona mafaufau lelei iai”, “Na finau Rishworth “e leai se mafuaaga tatau mo le faamasinoga e faia se faatautoga ma o se faaiuga vavevave le faaogaina o le principle of necessity”.

Fesili foi Vaai pe e auai le alii loia i le manatu o le faamasinoga e tagatagai lea i le tala faatatau autu o le tupe a Samoa mo le isi lima tausaga ma e tatau ai i le faamasinoga ona faaoga lea vaega e faataua ai le faatautoga.

Tali Rishworth “o vaega uma ia e tatau ona tagataga ai tagata ai faitulafono, ae e le’o se vaega autu lea mo le faamasinoga e iloiloina i le taimi nei”.

O le Aso Gafua o le vaiaso fou 28 o Iuni o le a tuu mai ai se iuga o lea mataupu.