I le faatolu ona tolopo le valaauina o molimau a leoleo e lagolago ai moliaga e fā o Maugaloto Palu, ua taunuu lenei mataupu i le toe faaui i tua e leoleo o moliaga ma faalēaogā ai e le faamasinoga sili.
O lē sa molia na ia faia se gaioiga i le uafu o vaa fagota i le nofoaga o loo iai le maketi o i’a i Savalalo na ia umia ai se agaese. O lea faalavelave ia Iuni o le tausaga e 2020 na pu’eina ai ma taofia e leoleo mo suesuega Maugaloto Palu o se tasi sa taalo i le aulakapi liki o le Toa Samoa. O alii na aafia i le solitulafono o ni fai faiva i se vaa fagota ma o le valaauina muamua o moliaga e suesue ai molimau, e lei oo atu.
O le tologa faalua e lei oo atu foi i le faamasinoga mo a la molimau, e oo lava ina toe valaau i le amataga o le vaiaso nei ua fiu leoleo e saili a latou molimau autu ia e to’alua ua lē oo atu lava. O le mafuaaga lea na talosaga ai loa le loia a leoleo e toe aumai i tua moliaga e fā e aofia ai le taumafai e faaoo le maliu i se isi tagata, o moliaga e lua o le faaoo manu’a tugā, ma le solitulafono o le umia o se aupega matautia.
E iai le isi mataupu o loo tuua’ia ai Maugaloto Palu ma o loo faatali mo suesuega a le faamasinoga, o lona umia lea o fualaau faasāina poo le possession of narcotics.
