O popolega ma atugaluga i ni aafiaga o le gataifale o Samoa i ni suāuu masaa aemaise i ogasami i Saute o le motu o Upolu ua goto uga ai le vaa su’esu’e o le fuāvaatau o le fitafita o le sami o le malo o Niu Sila, ua faailoa ai e le Sui Palemia le afioga Tuala Tevaga Iosefo Ponifasio, ua oo atu se lipoti i lona ofisa i le taeao o le Aso Lua o le vaiaso nei ua faailoa atu ai e leai ni molimau o ni suāuu ua masaa i le gataifale o nuu ma afioaga o loo tu lalata i le ogasami o loo goto ai le vaa su’esu’e o le HMNZS Manawanui.

I se pepa o faamatalaga ua faailoa ai foi e le Sui Palemia ua na o sina vaega o suāuu mai lea vaa o loo vaaia ae o loo faaaogā iai ni mea faigaluega e faapitoa i le aveesea o ni suāuu masaa.

O lea lipoti sa tuuina atu e le Ofisa Sili o le matagaluega o galuega tetele a le malo o le ta’ita’ifono o le komiti faufautua mo galuega tau i suāuu masaa ma le ta’ita’i o se augalulue o loo feagai ma galuega o loo mata’itū ai ni aafiaga o le gataifale mai ni suāuu masaa mai le vaa su’esu’e o le Manawanui.

O lea foi galuega o loo auai ma nisi o tagata popoto ma iai tomai i aafiaga o le gataifale o loo latou mata’itū ni faaletonu e tula’i mai.

O le Aso Lua foi na aumai ai i se tulaga faalaua’itele se faasilasilaga mai le Minisita o Galuega Tetele ma Fela’ua’iga le tofa Olo Afoa Fiti Vaai, ua faailoa ai le faasā pe tapu ona toe uia e se tagata poo ni tagata vaega o ogasami o loo goto ai le vaa su’esu’e o le fitafita o le sami a Niu Sila.

O lea foi tapu ua aofia ai ma se vaega o le nuu o Tafitoala i Safata o loo faamautū ai tagata uma o loo feagai ma ia galuega.

Faaalia e le Minisita o Galuega Tetele ma Fela’ua’iga i lea faasilasilaga faalaua’itele, o loo faagasolo ma faatino su’esu’ega ma galuega a matagaluega a le Malo e fitoitonu ma ni faaletonu tau suāuu masaa e pei ona galulue faatasi ai ma le Malo o Niu Sila.

O le Aso Lulu le ogatotonu o lenei vaiaso e pei ona faailoa i se lipoti a le leitio a Niu Sila ua tuua ai e le vaa o le Canterbury Aotearoa ma malaga mai i Samoa ma ni meafaigaluega e faaaogā i le faamamāina o ogasami e aafia ni suāuu masaa.

Ua faailoa foi i lea lipoti e tusa ma le tasi le afe tane le mamafa o suāuu o loo i luga o le vaa o le Manawanui lea ua goto i ogasami i Saute o Samoa.