Ua iai lipoti i le asō ua ta’ua ai le ono suia o vavao ma Tulafono e faatatau i le faia o talifofoga i nofoaga e pei o malaevaalele ma ua ta’ua e ono lē toe mana’omia ona faatino lea tulaga i ni nai aso o lumanai ai.  

Fai mai le faigamalo a le Feterale o le Komiti ua ta’ua o le Australian Health Protection Principal Committee ua o latou fautuaina le taofia o le faamalosia o le faia o talifofoga i malaevaalele i le atunuu e amata atu i le Aso Faraile o le vaiaso nei 17 o Iuni.  

Peitai o le a mana’omia pea ona faia talifofoga e pasese i luga o vaalele ma o le a iai se isi faaaliga e tuuina mai e tusa ai o lea tulaga.

Ua faia foi le fautuaga a le Komiti lea i le mae’a o le iloiloina o le tulaga ua iai nei puipuiga o le koviti i le atunuu ma iloa ai o le tele lava o nofoaga ua lē o toe manaomia ai ona faamalosia le faia o talifofoga.