O Oketopa o le masina ua faapitoa e faatāua ai le kanesa o le susu mo tina ma tamaitai. 

O le ala foi lea o le taulamua o le mafutaga a tama ma teine tuai o le Kolisi o Samoa i totonu o Niu Sila nei e faatino nisi o polokalame i totonu o le komuniti ina ia mafai ona galulue faatasi tagata uma e faamalosia tina e agai e fai a latou siaki poo iai ni aafiaga o lenei faama’i ua maua ai i latou. 

O le Aso Toonai ua mavae na tumutumu ai le paka o le Barry Curtis Parks i tina, o tama faapea le fanau sa latou laeiina atu le laei lanu piniki e faamamalu ai le masina ua faapitoa i le faamai lenei o le kanesa o le susu mo tina. 

Na amata le polokalame i le zumba ona sosoo lea ma le savaliga i totonu o le paka e famalosia ai tagata uma ina ia toaaga e fai le faamalositino auā le soifua maloloina lelei. 

O nai tina matutua ua ova ma le 70 tausaga le matutua sa vaaia i lea aso le sagisagi fiafia atu e molimauina le tāua o lenei faamoemoe. 

O le galuega soosootau’au a le mafutaga a le Kolisi o Samoa ma le Pacific Family Health Group o loo iai nisi o tausi soifua le afioga ia Galumalemana Vaifagaloa Naseri sa latou iloga ona unaia lenei polokalame mo tina uma o le komiuniti. 

Ta’ua e Galumalemana o le faama’i lenei ua ta’ua e nisi o se faama’i oti i le tagata, ae leiloa e leai, e mafua ona oo aafiaga tetele i le tina ua aafia i lenei faama’i ona o le lē alu e fai lana siaki o le susu e pei ona taulogologo mai ai le soifua maloloina. 

E tatau foi i tina ona aua le fefefe ae agai e fai a latou siaki auā lo latou saogalemu.