Mafuli le lagolago a tagata Aukilani i femalagaa’iga e leai se totogi. 

I su’esu’ega na faia e iuni tetele e lua a le First Union ma le Public Service Association ua sau ai le i’uga o le to’atele o loo manana’o e feoa’i fua i femalagaa’iga lautele. 

E 722 tagata Aukilani na fesiligia ma o le 73% o i latou nei e lagolagoina le faatumau o le feoa’i fua e leai se totogi, e ese ai le na o le 7% pasene o tagata e tetee. 

Mai le sui o le First Union i tala a le leitio a Niu Sila, o le feoa’i fua e lē totogia e faaaogā ai femalagaa’iga lautele o le a manuia ai le tamaoaiga ma faamāmā avega ai foi i le to’atele o aiga. 

O se talosaga foi afai ae talia, o se auala lelei lea e mafai ai ona ausia sini a le Council i itu tau femalagaa’iga. 

Mai se tasi o sui momo’e o loo finauina le tofi pulenuu o Aukilani, Faanana Efeso Collins ua ia ta’utino o le aso muamua lava e nofoia ai le nofoa o le pulenuu o le aso foi lea e amata feoa’i fua ai tagata Aukilani. 
Ina ua pa’ū le tau o femalagaa’iga i le 50% ia Aperila, na faaopoopo ai le 140,000 faigamalaga e faaaogā ai femalagaa’iga lautele.