Ua ioe le sui Faipule o le itumalo faapalota o Aleipata Itupa i Lalo i ona moliaga autū e lua o solitulafono tau taavale afi, ma ua faatulaga ai e le faamasinoga le aso 28 o le masina o Iulai e folasia ai ni finauga faaletulafono a lana loia, o se lipoti a le ofisa faanofo vaavaaia, se lipoti mai ia i latou na manunu’a i le faalavelave tau taavale na mafua ai ona molia le afioga Faleomavaega Titimaea Tafua, ma iloilo ai se faasalaga.
O le moliaga o le ave taavale faatamala ua manunu’a ai ni tagata, ma le moliaga o le ave taavale matautia ua ioe iai le sui Faipule.
E lima moliaga na tuuina atu e leoleo i le amataga o le fofogaina o lenei matāupu tau faamasinoga, peita’i o moliaga e tolu faaleoleo poo alternative charges ua faaui i tua.
I le tolopo ai mo le lua masina lenei matāupu ua faailoa e le faamasino le afioga Leota Raymond Schuster i taualumaga i le Aso Lua o le vaiaso nei, o le avanoa lea mo lē ua molia e faia ai sana a’oa’oga e le pulega o fela’ua’iga i luga o le laueleele i le faafoeina o le taavale mo le tausia o le saogalemu.
Ua faasā pe tapu ai ona toe umia e Faleomavaega se laisene avetaavale se’ia mae’a lea a’oa’oga, ma aumai se faasalaga i moliaga e lua ua ia ioeina.
Ua tuuina atu e le loia a lē ua molia se talosaga o le a finauina ai le faapafala o se faasalaga o le sui Faipule e aunoa ma le faamaonia o sana solitulafono.
O moliaga o solitulafono tau taavaleafi o le sui Faipule o Aleipata Itupa i Lalo na mafua ai ona faia lana faai’uga e faamavae ma le tofi Minisita o le Kpeneta sa filifilia iai.
O matāgaluega sa i lana vaaiga ua faasee atu e tauave e le Minisita o Faalapotopotoga Tuma’oti a le Malo ma le kamupani vaalele o le Samoa Airways le tofa Leatinuu Wayne Sooialo.
