Ua galulue nei leoleo a Ausetalia e su’esu’e gaioiga ma osofa’iga faasaga i tagata Isaraelu o loo tula’i mai i le taimi nei ma o loo su’esu’e ai foi pe faamaonia faamatalaga o ia ituaiga osofa’iga o loo faatupe mai e nisi mai fafo atu o Ausetalia, o loo latou totogi tagata solitulafono i Ausetalia nei e faatino ia gaioiga.
O le osofa’iga mulimuli i le vaiaso nei le susunuina o le Childcare Centre i Sini e pei ona lipotia atu i talafou ananafi ma ua tutū faatasi ai le alii Palemia o Albanese ma ta’ita’i o setete ma teritori o Ausetalia e tali atu i nei ituaiga amioga ma galulue faatasi ai ma leoleo.
Na saunoa le Komesina o leoleo a le Feterale, Reece Kershaw o loo latou vaavaai nei pe faamaonia o loo totogi mai e ni tagata mai fafo overseas actors le faatinoina o ia ituaiga osofa’iga ma o loo vaavaai foi pe o aofia ai ma ni tagata talavou ma ni faiga o loo una’ia ai i latou i luga o upega tafa’ilagi e faatino ia ituaiga osofa’iga i tagata Isaraelu.
Ua faailoa mai la i NSW ua 36 tagata ua molia i le mataupu lea ae i Vitoria e 70 ua pu’eina, fai mai le Palemia e lē iai se avanoa o ituaiga uiga ma amioga ia i totonu o Ausetalia ma ua tatau ona faamuta nei loa.
Puna o Faamatalaga: https://www.9news.com.au/national/maroubra-attack-antisemitic-message-left-on-childcare-walls-after-fire-in-sydney/da5735e4-139e-46cd-917f-9b6a8621c7ed
