E talitonu le ekalesia Metotisi i Fiti ma Rotuma ua lē mafai e le Malo ona lotea le mataupu lea e faatatau i fualaau faasāina i Fiti.

Fai mai lipoti o loo galulue nei le faigamalo ma le ekalesia ma isi e fesoota’i i tulaga tau a’oa’oga, i le siitia o polokalame faalea’oa’oga e faatatau i aafiaga o fualaau faasāina i tagata ta’ito’atasi, aiga ma le lautele.

O le Peresetene o le Ekalesia Metotisi i Fiti o Rev Dr Semisi Turagavou na ia faaaila i le leitio faavaomalo a Niu Sila, o le mataupu lea e lē mafai ona faafoe to’atasi e le malo ma leoleo ae mana’omia le tutū faatasi o tagata uma.

Ua ia ta’ua ua aafia ai foi ma le lotu aemaise i ona talavou ua aga’i i le faaaogāina ma le faatauina o fualaau faasāina e pei o le mariuana ma le aisa.

Talu ai nei sa faamauina ai le siitia o le faatauina ma le faaaogāina o fualaau faasāina i Fiti ma e fai foi si tele o mataupu e aofia ai fualaau faasāina o loo iai pea i le faamasinoga ma e manatu le faafeagaiga e tatau lava ona oo taumafaiga i le faapogai o le faafitauli, o vaega ia o le a aga’i iai taumafaiga ua faia nei.

Puna o Faamatalaga: https://www.rnz.co.nz/international/pacific-news/533871/fiji-methodist-church-leader-calls-for-partnerships-to-address-drug-issue