O feuiuia’iga i le feavea’iina o tupe mai fafo e pei o tupe faamomoli e lafo mai i le atunuu, o se auaunaga tau pisinisi e lavelave ma tele tulafono e faatonutonu ai.
O Samoa le tasi o atunuu e pei ona faailoa e le Kovana o le faletupe tutotonu i se fonotaga sa usuia i Brisbane i Ausetalia talu ai nei, sa finau malosi e faatalanoa le mataupu i le tapuni o teugatupe a pisinisi lafo tupe faamomoli e faletupe i fafo ona o atugaluga o aafiaga i tulafono i le feaveaiina o tupe.
O le Minisita o Tupe, o le Kovana o le Faletupe Tutotonu ma le faauluuluga o le pulega o tupe faavaomalo le SIFA, sa auai i le fonotaga muamua sa talanoaina ai lea tulaga ona o le naunautaiga o Samoa ia toe faaleleia auaunaga a faletupe faapisinisi poo commercial banks ma auaunaga e pei o pisinisi e lafo ma tala ai seleni faamomoli.
O le faia o lea fonotaga o se fuafuaga e pei ona faailoa i se pepa o faamatalaga, na taulamua ai le Palemia o Ausetalia ma le Pelesetene o Amerika i se faatasiga i le tausaga e 2022 sa finau ai ia ta’ita’i e tatau ona faatalanoa ia tulaga ma atunuu o le Pasefika, e pei ona mafua ai le fono sa auai atu ai le usugafono mai Samoa.
O Brisbane i Ausetalia sa faia ai lea fonotaga sa auai le Minisita o Tupe le afioga Lautimuia Uelese Vaai, ma lana usugafono o sui o le faletupe tutotonu ma le SIFA le Samoa International Finance Authority.
