O le lata ina mae’a ai o le taimi galue o le alii Komesina Maualuga o le Malo o Niu Sila i Samoa le susuga Trevor Matheson, ua faailoa ai e le Minisita o le Va i Fafo ma o ia foi o le Sui Palemia o Niu Sila, le Afioga Vaovasamanaia Winston Peters i se faasalalauga, le filifilia o le tamaitai o Si’alei Van Toor e avea ma Komesina Maualuga o Niu Sila mo Samoa.

O lea faasalalauga ua faailoa ai ma sui o le Malo o Niu Sila i le atunuu o Kanata ma le Iuni a Europa ma le faalapotopotoga o le NATO.

Mo le Komesina Maualuga filifilia mo Samoa, sa avea o ia ma sui o le Malo o Niu Sila i le atunuu o Rusia, na faapea foi ona avea ma faufautua sinia mo fefaatauaiga a Niu Sila.

E le gata o le a avea ma Komesina Maualuga o lona atunuu mo Samoa, ae o le a avea foi ma Konesula o Niu Sila i le teritori o Amerika Samoa.