Ua faailoa lautele e le ofisa sooupu o le Malo se tasi o filifiliga ua faamaonia i se faaiuga a le Kapeneta i lana fono masani i lenei vaiaso, ua tofia ai le susuga Tumanuvao Evile Falefatu e avea ma faauluuluga fou o le auaunaga a le Malo, le Pulega o Malaevaalele le Samoa Airport Authority.
Ua suitulaga o ia i le afioga Silimana’i Ueta Solomona sa tauaveina lea tulaga maualuga ae ua faamavae ona o nisi o tofiga ua filifilia iai.
O Tumanuvao Evile sa aoaoina i le aoga tulagalua a Gataivai i Savaii sosoo ai ma le Kolisi o Samoa, faaauau i le Iunivesite aoao a le atunuu, ae taualuga i le galuega faamisionare a lana ekalesia a Iesu keriso o le Au Paia o Aso e Gata Ai.
O le mae’a o lana faamisiona na aoaoina ai i le aoga faafomai i Fiti ma taliu mai ai i Samoa ma galue i lona tomai o se tagata poto faapitoa i le suiina o vai faafomai mo le togafitia o gasegase.
O se galuega na ia tuua ae see atu i le tausaga e 2013 ma auauna i le Pulega o Malaevaalele i le vaaia o le itu tau puipuiga seia oo ina filifilia ma faamaonia e le Kapeneta lona tulai mai e avea ma faatonu poo le Pule fou o Pulega o malaevaalele a Samoa.
E toalima na talosaga i le avanoa ae filifilia ai lea tamalii e tauaveina le tofiga mo le 3 tausaga o lana konekarate.
