Ua iai lagona e le o faia tutusa talosaga o loo faaulu mo avanoa sitiseni.

E faitau afe tagata ua nofomau i Niu Sila o loo faatali o latou sitiseni ma ua oo i le tausaga ma le 6 masina, ae o nisi e na o le 10 aso ae maua.

Molimau ai lipoti a le leitio a Niu Sila i lagona faanoanoa e le gata o le umi ona tatali ae o le fiu e faafesootai ma tuufesili ae leai se tali mautinoa.

E oo mai i le aso 18 o le masina faatoa uma atu, e 29,200 talosaga o loo faatali faaiuga, ma o le 9,161 o talosaga e mai le tausaga talu ai.

Ae mai le sooupu o le vaega o le va i fafo a le National, Todd Muller, e foliga mai o lea ua agai le Internal Affairs e faagaioi talosaga faatoa faaulu atu ma atili umi ai ona faatali talosaga ua leva ona taatitia.

O le tali a le Internal Affairs, o talosaga e le faamalieina uluai siaki e tuu ese ma faatulaga ia aua ai nei taofia le faagasologa o talosaga, ma o lea foi na iai fesuiaiga o le aufaigaluega ona o le tele o talosaga mo tusifolau.

O le fautuaga ua sau, ia mautinoa e atoa uma pepa faamaonia ma pepa faatumu i le taimi e faaulu ai se talosaga ina ia aua ai nei faatuai.