Fesiligia e le Taitai o le FAST gaioiga a le Komesina o Faigapalota ona o le fesuisuia’i o ana faasalalauga

I le feiloaiga a le vaega faaupufai a le Faatuatua I le Atua Samoa ua Tasi ma ofisa faasalalau I le taeao nei na faailoa mai ai e le Taitai o le FAST Fiame Naomi Mataafa lona fesiliga ma ona masalosaloga i faaiuga fai o loo faia e le Komesina o Faiga Palota ia Faimalomatumua Mathew Lemisio faatatau lea I le faigapalota a le atunuu.

O le finau a Fiame o loo fesiligia ai le fefo’ifo’ia’i o manatu a le Komesina ua ala ai ona tupu masalosaloga e lē sa’o le faiga o faaiuga ma o loo iai le lagona faa’au’au a le Komesina I leisi vaega faaupufai.

Taua e le sa’ofaapito I le maea ai o le faigapalota a le atunuu ma le faitauga aloaia o palota na tulai mai ai le 25 nofoa e maua e le FAST, 25 nofoa maua e le HRPP ma le tasi le sui tutoatasi , le afoiga ia Tuala Ponifasio.

Peitai I se isi faasalalauga mai le ofisa o le komesina I le vaiaso na tea nei ua faateia ai le FAST ina ua faailoa mai e 24 nofoa a le FAST, 25 le HRPP ma le tasi le sui tutoatasi. O lona uiga e le’o aofia ai le afioga ia Fiame Naomi Mataafa ma le afioga ia Tuala Ponifasio I lenei fainumera o sui o le FAST.

E pei ona silafia o le aso lulu o le vaiaso na tea nei na faailoa ai e Tuala lona filifilia lea o le FAST e avea ma vaega faaupufai e galue ai peitai o lea o loo tuu mai lava le finauga a le Ofisa o le komesina o faigapalota e le’o aloaia le auai o sui faipule ia e toalua I totonu o le FAST seia vagana ua maea ona faatautō I totonu o le palemene.

Na faalia foi e le taitaifono a le FAST ia Laauli Leautea Polataivao Schmidt I le afiafi o le Aso Sa le maea ai ona resitala o le afioga ia Fiame Naomi Mataafa ma Tuala Ponifasio e avea ma sui aloaia o le vaega faaupufai a le FAST.

O le fesili tele la a le taitai o le FAST ma ona sui a faipule “Poo le a tonu le mafuaaga ua eseese ai nei mau fesuiaiga I auala e tatau ona uia I le auai o sui tutoatasi I totonu o se vaega faaupufai”

Taua e Fiame, ua lē agai le iuga o le palota i manaoga a le atunuu e ala i a latou palota na faatino ae foliga mai o le a tālia i se faaiuga mai le faamasinoga ona o faaiuga ua fai e le Ofisa o le Komesina o faigapalota.

Taua foi e Fiame , afai ae maua le iuga o le faamasinoga e lē o tutusa ma le finau a le Komesina o faigapalota o le gaiogia amiotonu lava e tatau ona fai e le alii komesina o le “faamavae”