Ua faamatala e le Peresetene o Saina o Xi Jingping le la mafutaga ma Ausetalia o se mafutaga e feagai ma feliuliua’iga i tausaga talu ai ma ua ia una’ia ai le Palemia o Ausetalia, Anthony Albanese ina ia faaeteete ina ia faatumau pea le faiga faapaaga ua iai nei ua faaleleia.
Na feiloa’i ta’ita’i e lua a o faia le fonotaga a le G20 i Brazil ma ua faailoa ai i lipoti a le ABC sa ta’ua e le ta’ita’i o Saina i le silia ma le 10 tausaga talu ai ua faia ai nisi laasaga e faaleleia ai le sootaga a Saina ma Ausetalia e ui e iai foi ma nai milomiloga sa aofia ai.
Na tuuina ai e le faigamalo a Jingping ni tariffs lafoga totogi i oloa e auina atu i Saina peitai ua faailoa e Albanese ua sologa lelei le faagaioia o fefaataua’iga i le va o atunuu e lua.
O le faatolu ai lea ona feiloa’i ta’ita’i ia e to’alua, o le ulua’i feiloa’iga sa faia foi i se fonotaga a le G20 na faia i Bali i le 2022.
Ua valaaulia mai la e le ta’ita’i o Saina le Palemia o Albanese ina ia malaga atu e asia Beijing i le tausaga fou mo le fonotaga faaletausaga a ta’ita’i e faia i Saina i le tausaga fou.
Puna o Faamatalaga: https://www.abc.net.au/news/2024-11-19/g20-anthony-albanese-meets-xi-jinping/104616994
