O le toe tatala o tuaoi faavaomalo mo faigamalaga masani i le tele o atunuu o le lalolagi e aofia ai Samoa, ua aumai ai ma fautuaga a le matagaluega o le soifua mālōlōina i Samoa i puipuiga o le tasi o faama’i le monkeypox, lea ua aafia ai tagata i nisi o atunuu.
Ua aumai i se tulaga faalauaitele fautuaga a le soifua mālōlōina i lo tatou atunuu ina ia vave ona silafia e tagata āuga o lea faama’i e pei o le, fiva, tiga le ulu, tiga maso o le tino, tiga le tua, fulafula le ua, ma le oso o le faamaalili ma gagase le tino.
Ua aloa’ia ai nei e le faalapotopotoga o le soifua mālōlōina o le lalolagi le avea ai o lea faama’i pipisi o se faalavelave faafuase’i o le soifua mālōlōina lautele i le lalolagi e aofia ai ma Samoa. O le monkeypox o se faama’i e mafua i se vairusi e pipisi pe a latalata ma pa’i i le tagata ua aafia ma le tagata ua alia’e ai auga o le monkeypox.
Ua faaalia i se pepa o faasalalauga mai le soifua mālōlōina i Samoa o lipoti lata mai o le faama’i lenei, ua faaalia ai o le to’atele o tagata na aafia ua toe malolosi, peitai e iai nisi tagata sa matua aafia tele i ni auga tigaina.
