O le asō lea ua faalauiloa faalauaitele ai mai ai i le atunuu aemaise le aufaasalalau, e le tamaitai faipule o ia foi o le isi ta’ita’i o le vaega faaupufai a le Green Party, Chlöe Swarbrick, faatasi ai ma le lagolago a isi sui faipule e toalua o le patī, le faai’uga ua taunuu i ai le patī ma ua mae’a foi ona faailoa atu i le tamaitai faipule o loo aafia, ina ia faamavae mai le toe avea ma sui faipule o le Palemene.

O le faipule o Chlöe Swarbrick sa fai o ia ma sui o la’ua ma le ta’ita’i o Marama Davidson, e faalauiloa mai le faai’uga a le vaega faaupufai, ina ua uma ai suesuega sa faagasolo i tuua’iga faasaga i le tamaitai faipule o Tana, i ona sootaga i faiga lē tonu sa faia i ni tagata faimalaga mai sa aafia ai le kamupani (bicycle company) a lona toalua o Christian Hoff-Nielsen.

O le masina o Mati na faamalolo lē tumau ai (suspended) e le vaega faaupufai le latou faipule mai le patī a o faagasolo suesuega i lenei mataupu, ae sa maua atoa pea lona totogi o se Faipule, ma o le Aso Sa ananafi e pei ona maua ai le i’uga o le suesuega ma logoina ai loa le tamaitai faipule ina ia faamavae mai le tofi, ua atoa iai le 115 o aso talu ona faamalolo lē tumau mai le latou vaega faaupufai a le Green.

Na saunoa Swarbrick, mai suesuega na faagasolo ma i’uga ua taunuu iai, sa iloilo mae’ae’a e le komiti a le latou vaega faaupufai gaioiga uma ma aafiaga o Darleen Tana ma ua faia ai loa le latou faai’uga, sa lei tausisia e le tamaitai faipule faiga faavae ma agataualoa e ono ma tatau ona faatinoina e se faipule o le Palemene aemaise foi i totonu o a latou lava faiga faavae faavaega faaupufai.

Puna o Faamatalaga: https://www.nzherald.co.nz/nz/politics/greens-to-hold-press-conference-on-darleen-tana-investigation/XNIJ4IHPB5ASZAXROUDYSQLDOE