Ua faamautinoa ane e leoleo i le aai o Sini e lē o iai se lamatiaga i tagata lautele i le mae’a o se faalavelave na tula’i mai i le faai’uga o le vaiaso.

Fai mai le 9News o se alii e iai sootaga i tulaga o faalavelave fuafuaina lelei poo organised crimes na fasiotia i le faalavelave lea ina ua fana e le tagata i le ogatotonu o Sini a o taumafai tagata na iai i lea nofoaga e aga’i ese mai ma ‘aloese ma pulufana.

O le fesoasoani faavavave na valaau ane i Baptist St i Surry Hills e lata i Cleveland St ina ua maua atu lipoti o lea faalavelave.

O le faamatalaga a leoleo e faapea o le tagata ua maliu na fana a o saofa’i i totonu o lana taavale i se pamu lata ane, fai mai na momo’e ese mai ma lana taavale a o tuli ane e ni alii se to’alua faaa’upegaina i fana.

Na molimau nisi sa iai i lea faaitu i le fefefe o le to’atele a o faia tuliga ia ma tafana ae pea e le to’alua lea lē na taumafai e sola ese.

Na oo ane lē ua maliu i luga o Bathurst St ma i’u ina maliu ai mai ona manu’aga a o vāai iai le to’atele o tagata.

Ua faamaonia mai e leoleo o lē ua maliu o Niddal Acherkouk 30 tausaga le matua ma e iai sootaga i le vaega lea, organised crime entities.

Na maua se taavale o le ituaiga o le porsche ua susunu i se nofoaga e lata ane ma e manatu leoleo e iai sootaga i le faalavelave lea.

Ua faailoa foi e leoleo sa fuafuaina lelei lenei osofa’iga e alii e to’alua ia na aga’i ane ma osofa’ia lē ua maliu.

E le’i maua le to’alua lea ma o loo faia pea su’esu’ega.

Puna o Faamatalaga: https://www.9news.com.au/national/surry-hills-shooting-man-dies-gunshot-wound-sydney-street/0e036dfd-8281-418f-938e-efb1bb85a761