Ua faitioina e le Palemia o le atunuu, Jacinda Ardern fuafuaga o ni suiga i le welfare poo le soifua manuia o le atunuu e pei ona folasia e le vaega faaupufai a le National. Fai mai Ardern o i e faamaonia ai e lē o malamalama le itu agai i taumafaiga o loo faatulaga i le taimi nei e fesoasoani ai i tagata i galuega.
O le faai’uga o le vaiaso sa faalauiloa ai e le National ana fuafuaga mo tulaga tau galuega mo tagata ei lalo ifo o le 25 tausaga le matutua. O loo ta’ua i le Herald afai o se tagata sa maua se fesoasoani mai le welfare mo le silia ma le tausaga, ua faigaluega mo se tausaga ma ua lē toe agai i le welfare, e tatau ona agavaa sea tagata i se peimeni e afe tala.
Fai mai le Palemia i le faatalanoaga i le leitio a Niu Sila, ua leva ona iai le fesoasoani mo talavou e agai ai i galuega aemaise e silia ma le 5 afe tagata ua maua galuega i alo o le polokalame o le Mana in Mahi. Fai mai le Palemia e lē tutusa uma foi aafiaga o le faama’i i fale faigaluega ma e 33 afe tagata ua agai ese ma le penefiti ae toe foi i galuega i totonu o le tausaga e aofia ai ma se vaega tele o tupulaga talavou.
