E lē o faigofie i faia’oga le maualalalo o maka ua ausia e fanau mai su’ega NCEA, ma o lea ua faia vasega faaopoopo e fesoasoani atili ai i fanau a’oga.
Ua maua e tala fou e iai a’oga o lea ua faaaogā taimi o mālōlōga a fanau e tapenapena ai mo su’ega nei, a o nisi ua faia vasega faaopoopo a o lei amatalia a’oga i taimi masani o le aso.
Ua molimau nisi o faia’oga i lipoti a le leitio a Niu Sila, e lē faigofie le foi mai o faai’uga o su’ega o loo faaauau pea ona lē papasi le to’atele.
E ese mai i tapenaga mo mataupu o loo faia ai su’ega nei a le NCEA, o lea foi e faaaogā vasega faaopoopo e a’oa’o ai i fanau a’oga e lē iloa faaaogā masini komepiuta poo nisi lava foi o fanau e leai ni komepiuta i le fale e mafai ona faaaogā mo su’ega.
Ua lipotia e lē o faigofie i faia’oga, e pei ona toe molimau se tasi o faia’oga e lē o mafai ona faailoa le a’oga o loo galue ai, pe tusa o le’ afa o le fuainumera o fanau a’oga e ulufale atu i le Vasega 9 e lē lelei le faitau tusi ma e lē faigofie ai la le taumafai e fafao uma a’oa’oga nei i totonu o le taimi puupuu a o lei su’e i le NCEA i le Vasega 10.
Puna o Faamatalaga: ‘We have to get them up to speed’ – extra lunchtime studies for NCEA tests | RNZ News
